Aafgelaupe vriedigmerge bereikte os ut trieste bericht det aod prins en aod vorst Gerrit Hillen van CV De Beringse Kuus os ontvalle is.

Gerrit waas unne markante Beringenaar dae op jonge laeftiehd al un regionale bekindheid waas in gans gemeinte Helje. As DJ van zien eige piratezender Radio Tivoli slingerde hae iddere zonnigmerge vanoeht de Kaumeshook de allersjonste plaetjes de illegale ether in. Tot groëht vermaak van alle luusteraars.

Ut waas dan auch neet verwongerlik det Gerrit al op jonge laeftiehd woort oehtgeroope as hiërser beij De Beringse Kuus. In 1980 (as jongste prins oëits) moch Gerrit veurop gaon mit ziene spreuk ‘laot de zorge weije, wae gaon carnaval dreije’. Nao zien prinssjap naam Gerrit de honneurs as vorst euver van Lei van Kubbes, dae door ziekte zien taak neet miër kos volbringe. Gerrit is vervolges 10 jaor lang de vorst van De Beringse Kuus geweest.

Daonao heet hae zien groëhte hobby ‘pletjes dreije’ tiedes de Beringse vastelaovend nog jaore oehtgeveurd. Minnige carnavalsaovend woort door Gerrit op onnavolgbare wiehze aanein gedreijd en gekald. Want spraeke kos Gerrit as de biste. Soms mit get stamele d’r tussedoor, mer hae kos op un sjitterende menier de Beringse Kuuskes en Kuus vermake. En altiehd starte hae op mit zien eige intro ’time is tight’… Beij ut huüre van die klanke zal gans Beringe nog altiehd drek dinke aan DJ Gerrit!

Tot 2024 is Gerrit actief gebleeve vur de vereiniging. Zien litste taak waas as verslaaggaever van de Beringse optocht vur Omroep P&M.

Leeve Gerrit, wae weite zeker det ut daobove vanaaf now un stuk gezelliger wurt mit zonne stummingsmaker. Wae heije dich gaer nog jaore onger os gehad, want wae hebbe dich veuls te vreug motte laote gaon. Noëits gin jukebox time miër, noëits miër ’time is tight’. Names alle Beringse Kuuskes en Kuus wille wae dich bedanke vur alles wasse beteikent hees vur os dörpke.

Femilie Hillen, vriende en bekinde van Gerrit winse wae alle sterkte toe beij dit verlees.